Isa 45 | JAE | STEP | Apômtau kêsôm biŋ tonec gêdêŋ nê ŋac Kores, taŋ geŋ oso eŋ naŋ, gebe Aê kakam ênê lêma anôŋa tôŋ, gebe êku tenteŋlatu tulu êmuŋ eŋ ma êkwalec kiŋnêŋ ŋakwê su to êlêc katam su eŋ, gebe sênsaŋ auc atom.

Isaiah 45

Apômtau kêjaliŋ kiŋ Kores sa

1 Apômtau kêsôm biŋ tonec gêdêŋ
nê ŋac Kores, taŋ geŋ oso eŋ naŋ, gebe
Aê kakam ênê lêma anôŋa tôŋ,
gebe êku tenteŋlatu tulu êmuŋ eŋ
ma êkwalec kiŋnêŋ ŋakwê su to êlêc katam su eŋ,
gebe sênsaŋ auc atom.
2 “Aê oc jasêlêŋ jamuŋ aôm ma jaŋgôm lôc êtu tapa
ma jatuc katam ki popoc ma janac balaŋ ki tulu-tulugeŋ.
3 Ma oc jakêŋ awa totau-totau, taŋ sêsiŋ gêc gamêŋ ŋakesec naŋ, êndêŋ aôm
ma awamata, taŋ sêjac sa gêc gamêŋ ŋakêsiŋ naŋ êwiŋ.
Gebe ôjala gebe Apômtau Israelnêŋ Anôtô aê,
tec gamôêc aôm ŋa nêm ŋaê anôgeŋ,
4 kêtu ŋoc sakiŋwaga Jakobŋa ma kêtu Israel, taŋ kajaliŋ sa naŋŋa.
Aê gamôêc aôm ŋa nêm ŋaê anôgeŋ.
Aôm gôjam kauc aê, mago aê gaê aômnêm ŋaê.
5 Aê Apômtau ma teŋ gêmoa gêwiŋ atom.
Anôtô teŋ gêmoa gêwiŋ aê atom.
Aôm gôjam kauc aê, mago aê gajam gêlôŋ aôm
6 gebe lau aŋga oc kêpi to aŋga oc kêsêpŋa sêjala
gebe Anôtô teŋ gêmoa gêwiŋ aê atom.
Aê Apômtau ma teŋ gêmoa gêwiŋ atom.
7 Aê kakêŋ ŋawê to kamasaŋ ŋakesec.
Aê kamasaŋ gêŋ ŋajam ma kakêŋ gêŋwapac.
Aê Apômtau, taŋ gagôm gêŋ samob tonaŋ ŋai naŋ.”

Apômtau kêkêŋ undambê to nom

8 “O undambêac, ansêwa aŋga lôlôc,
ma biŋgêdêŋ êsêp aŋga umboŋ amboac kom gêjac.
Nom tau êŋa gebe Apômtaunê moasiŋ ênam kêsiŋa êpoa
ma êkêŋ biŋgêdêŋ êpi êwiŋ amboac tonaŋgeŋ.
Aê Apômtau kakêŋ gêŋ tau.”

9 Ojae êndêŋ ŋac, taŋ gêjam saic biŋ gêdêŋ nê ŋac- kêkêŋ-eŋwaga naŋ.
Eŋ kêtôm kunom teŋ, taŋ gêjac saic biŋ gêdêŋ ŋac- gêjac-kuwaga naŋ.
Nomku kêsôm gêdêŋ ŋac-gêjac-kuwaga gebe
“Aôm gôgôm asageŋ.” Kêsôm me.
Ma kôm ŋanô tau kêsôm gebe “Nêm lêmam ŋamêtê masi.” Kêsôm me.
10 Ojae êndêŋ ŋac, taŋ kêsôm gêdêŋ tama gebe “Aôm kôka asageŋ lasê,”
ma kêsôm gêdêŋ awê teŋ gebe “Aôm kôkôc asageŋ.”
11 Apômtau, Israelnê ŋac dabuŋ, ma nê ŋac-kêkêŋ- eŋwaga kêsôm biŋ tonec gebe
“Amac abe atu kênac aê êtu latuciŋa me.
Me abe ajatu aê êtu kôm, taŋ lemoc êŋgôm naŋŋa me.
12 Aê kakêŋ nom ma kamasaŋ ŋamalac, taŋ sêmoa nom naŋ.
Aê lemoc kalaiŋ undambê ma aê kajatu gêŋ undambêŋa samob.
13 Aê kajaliŋ kiŋ Kores sa kêtu biŋgêdêŋŋa
ma janam nê intêna samob êtu solop.
Eŋ oc êkwê ŋoc malac sa
ma êŋgamboac ŋoc lau kapoacwalôŋa su.
Eŋ êŋgôm êtu ŋaôli to ŋagêjô teŋŋa atom.”
Lausiŋ undambêŋa nêŋ Apômtau kêsôm biŋ tonaŋ.
14 Apômtau kêsôm biŋ tonec gebe

“Awamata Aiguptu to Aitiopia ŋagêŋ têtuluŋa
ma lau waso-waso aŋga Seba oc dêndêŋ aôm sêmêŋ ma têtu nêm gêŋ.
Êsêac sêndaŋguc aôm. Êsêac sêmêŋ tokapoacwalôgeŋ
ma sêpôŋ aeŋduc êndêŋ aôm ma têtaŋ êndêŋ aôm gebe
‘Anôtô gêmoa gêwiŋ aômgeŋ
ma anôtô teŋ gêmoa gêwiŋ atomanô.’”
15 Biŋŋanô, aôm Anôtô, taŋ kôsiŋ taôm naŋ.
O Israelnêŋ Anôtô aôm kêsiwaga tau.
16 Êsêac sêkôniŋ nêm ŋacjo samob tôŋ ma sêŋgôm êsêac majeŋ êsa.
Lau-sêsap-gwamwaga sêc sêwiŋ tauŋ tomajeŋgeŋ sêja.
17 Mago Apômtau gêjam Israel kêsi
ma oc ênam êsêac kêsi endeŋ tôŋgeŋ.
Êsêac oc sêkôniŋ amac to sêŋgôm amac majem êsa atom endeŋ tôŋgeŋ.

18 Gebe Apômtau, taŋ kêkêŋ undambê naŋ, eŋ taugeŋ Anôtô
ma kêkêŋ to kêmasaŋ nom e ŋajaŋa kêsa.
Eŋ kêkêŋ gêŋ tau wauc-waucgeŋ atom,
eŋ kêmasaŋ kêtu lau sêŋgôŋŋa.
Apômtau tonaŋ kêsôm biŋ tonec gebe
“Aê Apômtau ma teŋ gêmoa gêwiŋ atom.
19 Aê gajac biŋ kesec gamoa gamêŋ ŋakesecŋa atom.
Aê kasôm gêdêŋ Jakobnê wakuc atom gebe
‘Ansom aê aŋga gêŋ wauc-wauc ŋalêlôm.’
Aê Apômtau kasôm biŋŋanôgeŋ,
aê kasôm biŋ lasê gêc awêgeŋ.

Anôtô ŋanô to anôtôi dansaŋ Babilonŋa

20 “Amac tenteŋlatu ŋapopoc, taŋ asêp siŋ sawa naŋ,
amêŋ akac taôm sa api tageŋ.
Lau taŋ sêbalaŋ nêŋ gwamka sêwêgeŋ
ma teteŋ mec gêdêŋ anôtô teŋ,
taŋ kêtôm gebe ênam êsêac kêsi atom naŋ,
lau tonaŋ nêŋ kauc masi.
21 Awa nêm biŋ sa ma akêŋ nêm biŋ tau êsa êmêŋ
ma amansaŋ biŋ awiŋ taôm.
Asa gêjac miŋ biŋ tonec gêdêŋ andaŋgeŋ.
Ma asa geoc biŋ tau lasê wanêcgeŋ su.
Aê Apômtau kasôm atom me.
Anôtô teŋ gêmoa gêwiŋ aê atom.
Aa Anôtô ŋanô to kêsiwaga ma teŋ gêmoa gêwiŋ atom.

22 “O nom ŋamadiŋ samobac, akac taôm ôkwi andêŋ aê amêŋ
ma janam amac kêsi
gebe aê Anôtô ma teŋ gêmoa gêwiŋ aê atom.
23 Aê katôc lemoc kêpi tauc
ma biŋŋanô kêsa aê aocsuŋ,
biŋ tau êmu êndêŋ aê êmêŋ êtiam atom.
Lau samob sêpôŋ aeŋduc êndêŋ aêgeŋ
to lemeŋ samob têtôc êpi aê
ma samob sêsôm gebe
24 ‘Biŋgêdêŋ to ŋaclai ŋam kêsêp Anôtô taugeŋ.
Lau samob, taŋ sêjam saic biŋ eŋ naŋ, oc dêndêŋ eŋ sêna tomajeŋgeŋ.
25 Israelnêŋ wakuc samob oc ôliŋ êpi ma waeŋ êsa êtu Apômtauŋageŋ.’”